في الحلال

حاسة احساس اني رجعت طفله تاني ومحتاجاهم جنبي 
تنهد بهدوء 
_ بصي هقولك حاجة كلنا أكيد مفيش لينا غنى عن اهلنا ومهما كبرنا فأحنا قدامهم أطفال وعلطول بنبقى محتاجين وجودهم بس دي سنة الحياة كل واحد لازم يبقى ليه سكن ويبقى ليه حياة وأسرة جديدة وأطفال 
ثم أكمل بمرح
_وبعدين يا ست أنت أنت مش مبسوطة معايا ولا اي 
_لا لا متقولش كده يراجل ده أنا في قمه انبساطي معاك يبني أنا عمري ما حسيت اني مبسوطة كده 
_أبنك بعد كل ده وبقيت أبنك 
_ييووه أنت هتمسكلي في الكلمة ولا اي 
_خلاص خلاص بهزر يقلب أبن.... 
قاطع حديثه دق على الباب 
_أدخلي جوا أنت يا بسبوسة وأنا هشوف مين
_مين الغلس اللي جاي الساعة 11 بالليل ده 
_أنا اعرف يستي مش بلحق اتهني.
تحركت للداخل وتوجه هو ناحية باب المنزل فتحه لتدلف والدته للداخل وهي تتحدث بصوت عالي 
_اي يا يزيد ساعة على الباب علشان تفتح أنا رجليا وجعتني من الوقفة
_معلش يا ماما هو في حاجة ولا اي
_وهو أنا علشان اطلع عندك لازم يكون في حاجة هتحرم عليا بيتك 
_أي يا ماما الكلام اللي بتقوليه ده أنت على عيني وعلى رأسي يا ست الكل 
_على عينك وعلى راسك أنت لكن الست هانم بتاعتك اكيد مش طيقاني من ساعة ما أتجوزت وأنت بعدت عني ولا بتفكر تسأل عليا والهانم بتاعتك مبتفكرش حتى تنزل تقعد معانا 
وأكيد بدأت تعصيك عليا 
_أي الكلام ده حرام عليك والله 
اول حاجة يا أمي أنت شايفة ابنك ملهوش شخصية للدرجة دي 
تاني حاجة بسنت كرامتها من كرامتي واحترامها من احترامي من قبل ما أتجوز واتفقنا رجالة لرجالة أن مراتي هتبقى في شقتها هنا بعيد عنكم ودي كانت شروط أهلها وأنا وافقت عليها فحضرتك متجيش دلوقت وتطلعيني عيل ومش قد كلمتي 
اخر حاجة مش عارف بجد أنت شايفة بسنت كده لي والله العظيم هي طيبة جدا بس أنت حاولي تحبيها وتتقبليها يا أمي لأن دي مراتي وأنت أمي ويهمني جدا أنكم أنتوا الاتنين تكونوا متفقين وبتحبوا بعض 
_ماشي يا يزيد ماشي يا أبني أنا نازلة
ومش هطلع شقتك تاني 
خرجت مسرعة فجلس يزيد وهو يتنهد بضيق فخرجت بسنت 
_يزيد حرام عليك مكنتش زعلت طنط وخليتها تنزل زعلانه منك 
_أنا مش عارف أعمل اي بجد مكنش قصدي بس كلامها فور الډم في دماغي
_انا هدخل البس الاسدال بتاعي وننزلها دلوقت نراضيها 
_ماشي 
يتبع......